2006-04-20
Donostiako Plan Estrategikoak ideia-lehiaketa antolatu du Sormenaren Eguna dela eta

Apirilaren 21a Sormenaren Eguna da mundu mailan, eta Donostiako Plan Estrategikoak, sormena eta berrikuntza bultzatzeko apustuari jarraituz, ideia-lehiaketa bat antolatu du egun honetatik aurrera. Helburua donostiarrek etxebizitza, enplegua eta aisiarako eskaintza hobetzeko ideia sortzaileak ekartzea da.

Duela gutxi, Donostiako Plan Estrategikoak hiritarren pertzepzioari buruzko inkesta bat egin zuen, eta bertan emaitzak oso positiboak izan ziren orokorrean – donostiarren %95a pozik dago bere hirian bizitzeaz- baina, era berean, hobetzeko alderdiak ere identifikatu ziren, eta, horregatik hain zuzen ere, konponbideak planteatzeko gonbita egin nahi diegu hiritarrei inkestan gutxien baloratzen ziren gaietan irtenbideak bilatzeko: etxebizitza, enplegua eta aisiarako eskaintza. Ideiak apirilaren 21etik maiatzaren 20ra proposatu ahal izango dira www.donostiafutura.net webgunean, eta maiatzaren 24tik ekainaren 1era bozkatzeko aukera egongo da.

Etengabe aldatzen ari den mundu honetan, ezinbestekoa da ezagutza sortu, berritu eta eraikitzeko gure gaitasuna handitzea. Sormenak eragiten ditu hobekuntza dakarten aldaketak eta, hori dela eta, Donostiako Plan Estrategikoak Sormenaren Eguna aprobetxatu nahi du donostiarren sormena bultzatzeko. Sari gisa New Yorkera bidaia eskainiko duen ideia-lehiaketa hau, gainera, aukera bikaina da hiritarrek askatasun osoz Donostiari buruz duten iritzia eman eta hobekuntzak proposatzeko. Honez gain, Unibertsitateen laguntza eskatuko da gazteen parte-hartzea bultzatzeko, sormen-iturri baitira.

Sormenaren eta Berrikuntzaren Eguna, ideia berriak sortzeko eta irudimena gure bizitzaren arlo guztietan erabiltzeko dugun gaitasuna ospatzeko eguna da. “Sortzekogaitasuna duzu. Onar ezazu!” lemapean, 50 lurralde baino gehiagok ekitaldiak egingo dituzte egun horretan. Hain zuzen, sormen handienetariko historiako pertsonaiaren, Leonardo Da Vinciren jaiotza-eguna delako aukeratu da egun hori. Sormenaren eta Berrikuntzaren lehen Eguna 2002 urtean egin zen Chicago, San Diego, Río de Janeiro, Paris, Hamilton, Toronto eta Amsterdamen. Kanadako jende-talde bati bururatu zitzaion, eta mundu osoan barrena ari da hedatzen.

- Sormenaren Egunaren inguruan antolatu duen lehiaketaren oinarriak

- Parte hartu lehiaketan zure ideiekin